Muqdisho (Caasimada Online) – Siyaasiga Cabdiraxmaan Cabdishakuur Warsame oo war qoraal ah soo saaray ayaa ka hadlay dooda ka taagan dhameystirka xubnaha guddiyada doorashooyinka, isaga oo shaaca ka qaaday in liiska guddiga la saaray Xaawo Aadan Yare Culusow (Xaawo Kiin), taas oo ka mid aheyd xubnihii uu soo magacaabay Qoor Qoor.
Cabdiraxmaan Cabdishakuur ayaa shaaca ka qaaday in sabab la xiriirta inay kasoo horjeedo Farmaajo darteed looga saaray liiska guddiga, sida uu hadalka u dhigay.
Sidoo kale wuxuu intaasi ku daray in weli ku dhowaad 20 xubnood oo taageerayaal u ah madaxweynaha muddo xileedkiisa uu dhammaaday ay ku jiraan guddiyada doorashada.
“Waxaa guddiga doorashada laga saaray Xaawo Aadan Yare Culusow oo lagu eedeeyey in ay Farmaajo ka soo horjeedday, kana tirsanayd taageerayaasha mucaaradka. Dhinaca kale, ku dhowaad 20 ruux oo taageerayaasha Farmaajo ah iyo toboneeyo dharcad ah ayaa weli Guddiga ku jira,” ayuu qoraalkiisa ku yiri siyaasiga Cabdiraxmaan Cabdishakuur Warsame.
Musharraxan ayaa sidoo kale xusay in arrintani ay mugdi-gelin karto dadaallada uu wado ra’iisul wasaare Maxamed Xuseen Rooble oo isagu maamulaya doorashooyinka dalka.
“Haddii uu sidan ku soo baxo liiska guddiga, waxay tani mugdi gelinaysaa hufnaanta Guddiga iyo dhexdhexaadnimada Raysalwasaare Rooble,” ayuu markale yiri.
Hadakan ayaa kusoo aadayo, iyadoo Xaawo Kiin oo ka mid aheyd xubnihii uu dhowaan dib usoo magacaabay madaxweynaha dowlad goboleedka Galmudug Axmed Qoor Qoor ay shaacisay inay is-casishay, kadib qoraal kooban oo ay soo dhigtay barteeda Facebook-ga,
“Waxaan ogeysiinayaa dhammaan umadda Soomaaliyeed inaan iska casilay xubinimadii gudiga doorashooyinka heer maamul goboleed ee Galmudug, ee uu ii magacaabay 16/06/2021 madaxweynaha Galmudug Axmed Cabdi Kaariye Qoor Qoor,” ayey tiri Kiin.
Si kastaba arrimahan ayaa kusoo aadayo, iyada oo weli ay dood adag ka taagan tahay guddiga doorashooyinka oo ay horey tabasho uga keeneen musharraxiinta mucaaradka.
The post CC Shakuur oo ka digay arrin mugdi-gelineysa dadaalka Rooble ee doorashooyinka appeared first on Caasimada Online.
source https://www.caasimada.net/cc-shakuur-oo-ka-digay-arrin-mugdi-gelineysa-dadaalka-rooble-ee-doorashooyinka/
0 Comments