Baydhabo (Caasimada Online) – Wararka laga helayo gobolka Shabeelaha Hoose ayaa sheegaya in saacadihii la soo dhaafay dagaal u dhexeeyey kooxda Macawiisley iyo Al-Shabaab uu ka dhacay qeybo ka mid ah gobolka Shabeelaha Hoose.
Dagaalka oo ahaa mid culus ayaa yimid, kadib markii dagaalyahanada Al-Shabaab ay weerareen goobo ay ku sugnaayeen kooxda Macawiisley oo ku yaalla deegaannada Yaaqbariweyne iyo Kaba-Hirig oo u dhow garoonka diyaaradaha Balidoogle.
Sidoo kale wararka ayaa sheegaya in kooxda Macawiisley oo ka war-helay weerarkaasi ay dagaal kala hortageen Al-Shabaab, islamarkaana uu jiro khasaara isugu jira dhimasho iyo dhaawac.
Sarkaal ka tirsan ciidamada dowladda oo ku sugan Shabeelaha Hoose ayaa sheegay in lagu jabiyey dagaalkaasi kooxda Al-Shabaab, islamarkaana lagu gaarsiiyey khasaare aad u culus.
Sidoo kale sarkaalkan ayaa sheegay in dagaalyahanada Al-Shabaab ay horey u afduubteen afar qof oo shacab ah oo labo ka mid ah uu xusay inay toogasho ku dileen, sida uu hadalka u dhigay.
Xaaladda ayaa haatan ah mid degan, waxaana goobihii lagu dagaalamay ku sugan kooxda Macawiisley, iyadoona lagu soo warramayo inay raggii weerarka soo qaaday ay dib u laabteen.
source https://www.caasimada.net/al-shabaab-oo-dagaal-culus-kadib-afduub-ka-geystay-sh-hoose/
0 Comments